ବିପ୍ଲବୀ ପରିକ୍ରମା ବ୍ୟୁରୋ :- ପାସେଞ୍ଜର ଟ୍ରେନରେ ଭୟଙ୍କର ଅଗ୍ନିକାଣ୍ଡ । ହୁତୁ ହୁତ ହୋଇ ଜଳିଗଲା ଏକ୍ସପ୍ରେସ ଟ୍ରେନ । ଆଜି (ରବିବାର) ସକାଳେ ବିଶାଖାପାଟନମ ରେଳ ଷ୍ଟେସନରେ କୋରବା-ବିଶାଖାପାଟନମ ଏକ୍ସପ୍ରେସରେ ଏହି ଅଗ୍ନିକାଣ୍ଡ ଘଟିଛି । ଟ୍ରେନଟି ପ୍ଲାଟଫର୍ମରେ ଛିଡା ହୋଇଥିବା ବେଳେ ୩ଟି ଏସି ବଗି ସମ୍ପୂର୍ଣ୍ଣ ଜଳି ଯାଇଛି । ତେବେ ସୌଭାଗ୍ୟବଶତଃ ଏଥିରେ କୌଣସି ଯାତ୍ରୀ ମୃତାହତ ହୋଇନାହାନ୍ତି । ଠିକ୍ ସମୟରେ ସମସ୍ତ ଯାତ୍ରୀଙ୍କୁ ଟ୍ରେନ ଭିତରୁ ସୁରକ୍ଷିତ ବାହାର କରାଯାଇଥିବାରୁ ନିଶ୍ଚିତ ଭାବରେ ବଡ଼ ଅଘଟଣ ଟଳି ଯାଇଛି ।ସୂଚନା ଅନୁଯାୟୀ, ଏହି ଟ୍ରେନ ଛତିଶଗଡ଼ର କୋରବାରୁ ତିରୁପତି ଯାଉଥିଲା । ଆଜି ସକାଳେ ବିଶାଖାପାଟନମ ଷ୍ଟେସନର ୪-ନଂ ପ୍ଲାଟଫର୍ମରେ ଛିଡା ହୋଇଥିବା ବେଳେ ଏଥିରେ ଭୟଙ୍କର ଅଗ୍ନିକାଣ୍ଡ ଘଟିଥିଲା । କୌଣସି କାରଣରୁ ପ୍ରଥମେ ଟ୍ରେନର A1 କୋଚରେ ନିଆଁ ଲାଗିଥିଲା । ଚାହୁଁ ଚାହୁଁ ନିଆଁ ଆଉ ଦୁଇଟି ବଗିକୁ ବ୍ୟାପି ଯାଇଥିଲା । ଏହା ଦେଖି ଯାତ୍ରୀଙ୍କ ମଧ୍ୟରେ ଆତଙ୍କ ଖେଳି ଯାଇଥିଲା । ରେଲୱେ ଅଧିକାରୀମାନେ ସଙ୍ଗେ ସଙ୍ଗେ ଟ୍ରେନ ଭିତରୁ ଯାତ୍ରୀମାନଙ୍କୁ ବାହାର କରିଥିଲେ ।