ପୁରୀ ( ବିପ୍ଲବୀ ପରିକ୍ରମା ):- ଆନ୍ଧ୍ର ତିରୁପତି ମନ୍ଦିରରେ ପ୍ରସ୍ତୁତ ପବିତ୍ର ଲଡୁ ପ୍ରସାଦରେ ପଶୁ ଚର୍ବିର ଘିଅ ଖବର ସାମ୍ନାକୁ ଆସିବା ପରେ ଶ୍ରୀମନ୍ଦିରରେ ମହାପ୍ରସାଦରେ ବ୍ୟବହୃତ ଘିଅର ମାନକୁ ନେଇ ଉଠିଛି ପ୍ରଶ୍ନ। ଖାଲି ମହାପ୍ରସାଦ ନୁହେଁ, ବିଭିନ୍ନ ପ୍ରକାର ଶୁଖିଲି ଭୋଗ ଓ ଦୀପରେ ନକଲି ଘିଅ ବ୍ୟବହାର ହେଉଥିବାର ଆଶଙ୍କା କରି ତାର ମାନ ଯାଞ୍ଚ ପାଇଁ ବିଭିନ୍ନ ମହଲରୁ ଦାବି ଉଠିଛି। ଜିଲ୍ଲାପାଳ ବି କହିଛନ୍ତି ଖୁବ୍ଶୀଘ୍ର ଶ୍ରୀମନ୍ଦିରରେ ବ୍ୟବହୃତ ଘିଅକୁ ଫୁଡ୍ ସେଫ୍ଟି ଅଧିକାରୀଙ୍କ ଦ୍ବାରା ଯାଞ୍ଚ କରାଯିବା ଦିଗରେ ପଦକ୍ଷେପ ନିଆଯିବ। ବରାଦି ଭୋଗଠୁ ନେଇ ପିଠା, ଖଜା ଭଳି ଶୁଖିଲି ଭୋଗରେ ବ୍ୟବହୃତ ଘିଅ କେତେ ଶୁଦ୍ଧ ? ବିକ୍ରି ହେଉଥିବା ଦୀପରେ ଲାଗୁଛି କେଉଁ ପ୍ରକାରର ଘିଅ ? ଏସବୁ ଘିଅ ଅସଲି ନା ନକଲି ? ଆନ୍ଦୋଳିତ କରୁଥିବା ଏସବୁ ପୁଳା ପୁଳା ପ୍ରଶ୍ନ ଭିତରେ ଶ୍ରୀମନ୍ଦିରରେ ବ୍ୟବହୃତ ହେଉଥିବା ଘିଅର ମାନ ଯାଞ୍ଚ ପାଇଁ ପୁରୀ ଜିଲ୍ଲାପାଳଙ୍କୁ ଦାବିପତ୍ର ଦେଇଛନ୍ତି ଆଇନଜୀବୀ ଦିଲୀପ ବରାଳ। ତାଙ୍କର ଦାବି ତିରୁପତି ଘଟଣା ପରେ, ଏଠି ଯେମିତି ଭକ୍ତଙ୍କ ଭାବାବେଗ ସହ କେହି ଖେଳ ଖେଳିବେ ନାହିଁ ସେଥିପାଇଁ ତୁରନ୍ତ ଘିଅର ମାନ ପରୀକ୍ଷା କରାଯାଉ। ଏପଟେ ମହାପ୍ରସାଦ ଓ ଦୀପରେ ନକଲି କିମ୍ବା ଅପମିଶ୍ରିତ ଘିଅ ବ୍ୟବହାର ନେଇ ଅଭିଯୋଗକୁ ଖଣ୍ଡନ କରିଛି ସୁଆର ଓ ମହାସୁଆର ନିଯୋଗ। ନିଯୋଗ ସଂପାଦକ ନାରାୟଣ ମହାସୁଆର କହିଛନ୍ତି, ଶ୍ରୀମନ୍ଦିରରେ କେବଳ ଓମଫେଡ୍ ପ୍ରସ୍ତୁତ ଘିଅ ବ୍ୟବହାର ହେଉଛି। ସରକାର ଚାହିଁଲେ ସେ ଘିଅର ମାନ ଯାଞ୍ଚ କରି ପାରନ୍ତି। ତିରୁପତି ଲଡୁ ବିବାଦ କୋଟି କୋଟି ହିନ୍ଦୁଙ୍କ ଧର୍ମୀୟ ଭାବନା ପ୍ରତି ଶକ୍ତ କୁଠାରଘାତ କରିଛି। ତେଣୁ ଏଭଳି ସ୍ଥିତିରେ ସନ୍ଦେହ ମୋଚନ ପାଇଁ ଦାବି ମୁତାବକ କେବେ ଶ୍ରୀମନ୍ଦିରରେ ବ୍ୟବହୃତ ଘିଅର ମାନ ଯାଞ୍ଚ ହେଉଛି ଏବେ ତା ଉପରେ ନଜର।