ଯାଜପୁର ( ବିପ୍ଲବୀ ପରିକ୍ରମା ):- ଯାଜପୁରରୁ ଲଢିବେ କି ପ୍ରଣବ ପ୍ରକାଶ ଦାସ । ଆଜି ଯାଜପୁରରେ ଏଭଳି କିଛି ସଙ୍କେତ ଦେଇଛନ୍ତି ବିଜେଡି ନେତା ପ୍ରଣବ ପ୍ରକାଶ ଦାସ । ଯାଜପୁର ନିର୍ବାଚନମଣ୍ଡଳୀ କୁଆଶ ମଙ୍ଗଳା ପୀଠରେ ଏକ ବିଜେଡି ସଭାର ଆୟୋଜନ କରାଯାଇଥିଲା । ଏଥିରେ ପ୍ରଣବ ପ୍ରକାଶ ଦାସ କହିଛନ୍ତି, ନବୀନ ପଟ୍ଟନାୟକ ତାଙ୍କୁ ସମ୍ବଲପୁର ପଠାଇଥିଲେ ଲଢିବା ପାଇଁ । ଏହି ୪ ମାସ ଭିତରେ ସେ ଯାଜପୁର ଆସି ପାରିନାହାନ୍ତି । କିନ୍ତୁ ଯାଜପୁର ବାସୀ ତାଙ୍କ ସମ୍ମାନ ରଖିଛନ୍ତି । ଯାଜପୁରରୁ ସେ ପୁଣି ଲଢିବା ପାଇଁ ପ୍ରସ୍ତୁତ ଅଛି ବୋଲି କହିଛନ୍ତି …କେଉଁ ଲଢ଼େଇକୁ ବବିଙ୍କ ଇସାରା ? ଉପନିର୍ବାଚନ ଜରିଆରେ ପୁଣି ଯାଜପୁର ଅକ୍ତିଆର ପାଇଁ ଚାଲିଛି କି ଚାଲ୍ ? ସେନେଇ ବଢ଼ିଛି ନାନା ଚର୍ଚ୍ଚା।ବବି କହିଛନ୍ତି, ଯେତେବେଳେ ପୁଅ ମାଆ ପାଖକୁ ଆସେ କୌଣସି ଶକ୍ତି ଅଟକାଇ ପାରିବନି। ଆପଣମାନଙ୍କୁ ଦେଖି ଶତ ସିଂହର ବଳ ଆସିଛି, ମୁଁ ପୁଣି ଲଢ଼ିବାକୁ ପ୍ରସ୍ତୁତ ବୋଲି ଉପସ୍ଥିତ କର୍ମୀଙ୍କୁ ସମ୍ବୋଧନ କରି କହିଛନ୍ତି ବବି। ତା’ସହ ବିଜେପିକୁ ନିଶାନା କରି କହିଛନ୍ତି, ବିଜେପି ଯାଜପୁରର ବିକାଶ ଚାହୁଁନି। ତେବେ ଏନେଇ ବିଜେପି ପକ୍ଷରୁ କୌଣସି ପ୍ରତିକ୍ରିୟା ମିଳିପାରନି।