କଟକ ( ବିପ୍ଲବୀ ପରିକ୍ରମା ):- ଧରା ହେଲେ ଆଉ ଜଣେ ରଙ୍ଗିଲା ବାବା । ଏଥର ଅପରାଧ ବି ସେହି ଯୁବତୀ ଅପହରଣ । ବାବା ଯୁବତୀଙ୍କୁ ଅପହରଣ କରିଥିବା ଅଭିଯୋଗ ହେବା ପରେ ପୋଲିସ ତାଙ୍କୁ ଧରିଛି । ଏଭଳି ଘଟଣା ଘଟିଛି କଟକ ତିଗିରିଆ ସୋମପଡା ଆଶ୍ରମରେ। ବାବା ଯୁବତୀଙ୍କୁ ଅପହରଣ କରି ଅନୈତିକ କାର୍ଯ୍ୟ କରୁଥିଲେ। ଏମିତି କିଛି ସାଂଘାତିକ ଅଭିଯୋଗ ଆସିଛି ବାବା କୈବଲ୍ୟ ଜାନିଙ୍କ ନାଁରେ । ସୁଚନା ଅନୁସାରେ କଟକ ଜିଲ୍ଲା ତିଗିରିଆ ଥାନା ଅଞ୍ଚଳରେ ଦୀର୍ଘବର୍ଷ ଧରି ଆଶ୍ରମ କରି ରହୁଥିବା ଏହି ରଙ୍ଗିଲା ବାବା ଢେଙ୍କାନାଳ ଅଞ୍ଚଳର ଜଣେ ଯୁବତୀଙ୍କୁ ଅପହରଣ କରିଥିବା ନେଇ ସଂପୃକ୍ତ ବାବାଙ୍କ ନାଁରେ ଯୁବତୀଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିଲେ। ଅଭିଯୋଗ ଅନୁସାରେ ପାରିବାରିକ ସମସ୍ୟାର ସମାଧାନ ପାଇଁ ଯୁବତୀ ଜଣକ ଉକ୍ତ ବାବାଙ୍କ ନିକଟକୁ ଯିବା ଆସିବା କରୁଥିଲେ। ଏହାରି ମଧ୍ୟରେ ବାବା ଉକ୍ତ ଯୁବତୀଙ୍କ ସହ ସମ୍ପର୍କ ବୃଦ୍ଧି କରିଥିଲେ। କିଛି ଦିନ ପରେ ଯୁବତୀ ଜଣକ ନିଖୋଜ ହୋଇଯାଇଥିଲେ ଓ ତା ପରେ ପରିବାର ଲୋକେ ତାଙ୍କୁ ବାବା ଜଣଙ୍କ ଅପହରଣ କରି ନେଇଛନ୍ତି ବୋଲି, ଯୁବତୀଙ୍କ ବାପା ଗତ ୭ ତାରିଖ ଦିନ ଢେଙ୍କାନାଳ ସଦର ଥାନା ଅଧୀନ ଭାପୁର ଫାଣ୍ଡିରେ ଅଭିଯୋଗ କରିଥିଲେ। ଏହି ଘଟଣାକୁ ଗୁରୁତର ସହ ନେଇ ଢେ଼ଙ୍କାନାଳ ପୋଲିସ ଶନିବାର ତିଗିରିଆ ସୋମପଡା ସ୍ଥିତ ବାବାଙ୍କ ଆଶ୍ରମରେ ଚଢ଼ାଉ କରିଥିଲା। ସମ୍ପୃକ୍ତ ବାବାଙ୍କ ନିକଟରୁ ପୋଲିସ ବହୁ ଆପତ୍ତି ଜନକ ଜିନିଷ ଓ ବିଭିନ୍ନ ଯୁବତୀଙ୍କ ଫଟ ମିଳିଥିଲା ବେଳେ ବାବାକୁ ଗିରଫ କରିଥିଲା ଢେଙ୍କାନାଳ ପୋଲିସ ।