ଗଜପତି ( ବିପ୍ଲବୀ ପରିକ୍ରମା ):- ଗଜପତି ଜିଲ୍ଲା ସଦର ମହକୁମା ପାରଳାଖେମୁଣ୍ଡି ସହରର ରାମସାଗର ରୋଡ ସ୍ଥିତ ୟୁନିୟନ ବ୍ୟାଙ୍କ ନିକଟରେ ଥିବା ଶାନ୍ତି ନଗରର ଜଣେ ନାବାଳିକାଙ୍କ ସନ୍ଦେହଜନକ ଭାବେ ଝୁଲନ୍ତା ମୃତ ଦେହ ଉଦ୍ଧାର ହୋଇଥିବାର ଜଣାପଡିଛି । ଗତକାଲି ନାବାଳିକା ଜଣକଙ୍କ ମୃତ୍ୟ ଘଟିଥିବାର ଜଣାପଡିଛି । ଘଟଣାରୁ ପ୍ରକାଶ ଯେ, ମୃତ ଶ୍ରଦ୍ଧାଞ୍ଜଳୀ ପାତ୍ର (୧୫) ମହାରାଜାଙ୍କ ବାଳିକା ଉଚ୍ଚ ବିଦ୍ୟାଳୟରେ ନବମ ଶ୍ରେଣୀରେ ଅଧ୍ୟୟନ କରନ୍ତି । ସେ ତାଙ୍କ ସାବତ ବାପା ଏବଂ ନିଜ ମାଙ୍କ ଘରେ ରହି ଆସୁଥିଲେ । ମୃତ ନାବାଳିକାଙ୍କ ନିଜ ପିତାଙ୍କୁ ତାଙ୍କ ମା ଛାଡି ଦେବା ପରେ ଦ୍ବିତୀୟ ବିବାହ କରିଥିଲେ । ଶ୍ରଦ୍ଧାଞ୍ଜଳୀ ପ୍ରଥମ ପିତାଙ୍କ ଏକ ମାତ୍ର କନ୍ୟା ଅଟନ୍ତି । ନିଜ ପିତା ଗତ ପ୍ରାୟ ତିନି ବର୍ଷ ହେବ ମୃତ୍ୟବରଣ କରିଥିବାର ଜଣାପଡିଛି । ତେଣୁ ସେ ସାବତ ପିତା ଙ୍କ ଘରେ ରହିଆସୁଥିଲେ । ତେବେ କୌଣସି କାରଣରୁ ତାଙ୍କ ଉପରେ ତାଙ୍କ ସାବତ ପିତା ଓ ନିଜ ମା ଅକଥନୀୟ ଦଣ୍ଡ ଦେଉଥିବାର ଅଞ୍ଚଳବାସୀଙ୍କ ମଧ୍ୟରେ ଆଲୋଚନା ହେଉଛି ।
ଏପରି ଅତ୍ୟାଚାରକୁ ସହ୍ୟ ନ କରି ହୁଏତ ଆତ୍ମହତ୍ୟା କରିଥାଇପାରନ୍ତି ବୋଲି ଚର୍ଚ୍ଚା ହେଉଥିବା ବେଳେ ତାଙ୍କୁ କେହି ମାରି ଝୁଲାଇ ଦେଇଥିବାର ମଧ୍ୟ ଆଲୋଚନା ହେଉଛି । ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ପାରଳାଖେମୁଣ୍ଡି ଆଦର୍ଶ ଥାନା ପୋଲିସ ପହଞ୍ଚି ଶବକୁ ଜବତ କରି ବ୍ୟବଛେଦ ନିମନ୍ତେ ଆଜି ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଦେଇଛନ୍ତି । ଏନେଇ ପାରଳା ଆଦର୍ଶ ଥାନାରେ ଦଫା ୩୦୬ ଲଗାଇ ତଦନ୍ତ ଜାରି ରହିଥିବାର ଥାନା ସୂତ୍ରରୁ ପ୍ରକାଶ ପାଇଛି । ତେବେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ଥାନା ଅଧିକାରୀ ପ୍ରଶାନ୍ତ ଭୂପତି କହିଛନ୍ତି ।