ନୂଆଦିଲ୍ଲୀ ( ବିପ୍ଲବୀ ପରିକ୍ରମା ):- ଆଜି ଦେଶରେ ସାଧାରଣ ନିର୍ବାଚନର ଷଷ୍ଠ ପର୍ଯ୍ୟାୟ ମତଦାନ ଜାରି ରହିଛି । 8ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୋଟ 58 ଲୋକସଭା ଆସନରେ ଚାଲିଛି ଭୋଟିଂ। ଗଣତନ୍ତ୍ରର ଏହି ମହାପର୍ବରେ ନେତୃତ୍ବ ବାଛିବା ପାଇଁ ଜନତା ଜନାର୍ଦ୍ଦନ ସେମାନଙ୍କର ସାମ୍ବିଧାନିକ ମତାଧିକାର ସାବ୍ୟସ୍ତ କରୁଛନ୍ତି ।
ଏହିକ୍ରମରେ ଦେଶର ପ୍ରଥମ ନାଗରିକ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଧ୍ୟ ନିଜ ସାମ୍ବିଧାନିକ ମତାଧିକାର ସାବ୍ୟସ୍ତ କରିଛନ୍ତି । ରାଷ୍ଟ୍ରପତି ଭବନ ପରିସରରେ ଥିବା ଡଃ ରାଜେନ୍ଦ୍ର ପ୍ରସାଦ କେନ୍ଦ୍ରୀୟ ବିଦ୍ୟାଳୟରେ ହୋଇଥିବା ମହିଳା ପରିଚାଳିତ ପିଙ୍କ୍ ବୁଥରେ ଭୋଟ ଦେଇଛନ୍ତି ରାଷ୍ଟ୍ରପତି । ସମ୍ପୂର୍ଣ୍ଣ ଭୋଟିଂ ପ୍ରକ୍ରିୟା ଅନୁସାରେ, ରାଷ୍ଟ୍ରପତି ଭୋଟ ଦେବା ସହ ବୁଥରେ କରାଯାଇଥିବା ‘ଭୋଟିଂ ସେଲ୍ଫିଂ ପଏଣ୍ଟ’ରେ ଫଟୋ ମଧ୍ୟ ଉଠାଇ ମତଦାତାଙ୍କୁ ଉତ୍ସାହିତ କରିଛନ୍ତି ।
ଏ ସମ୍ପର୍କରେ ରାଷ୍ଟ୍ରପତି ଭବନ ପକ୍ଷରୁ ‘ଏକ୍ସ’ରେ ଏକାଧିକ ଫଟୋ ସେୟାର କରାଯାଇ ସୂଚନା ପ୍ରଦାନ କରାଯାଇଛି ।