ସାନଖେମୁଣ୍ଡି ( ବିପ୍ଲବୀ ପରିକ୍ରମା ):- ସାନଖେମୁଣ୍ଡି ବ୍ଲକ ପାଟପୁର ଗାନ୍ଧୀ ଛକ ମହାଲକ୍ଷ୍ମୀ ମନ୍ଦିର ନିକଟରେ ଥିବା ଆମ୍ବ ଗଛ ତଳେ ବିଶ୍ରାମ ନେଉଥିବା ସମୟରେ ରବିବାର ଅପରାହ୍ନ ପ୍ରାୟ ୪ ଟାରେ ବଜ୍ରପାତ ଯୋଗୁଁ ପାଟପୁର ଠାକୁରାଣୀ ଯାତ୍ରା ପାଇଁ ଆସିଥିବା ମୀନା ବଜାର ର ୨ ଶ୍ରମିକ ମୃତ୍ୟୁବରଣ କରିଥିବା ଜଣାପଡିଛି। ମୃତକ ଦ୍ବୟ ହେଲେ ପୁରୀ ଜିଲା ନିରାକାରପୁର ଥାନା ଆଲିପଡା ଗ୍ରାମର ଡୁଗୁଲା ପ୍ରଧାନ ଏବଂ ଗଞ୍ଜାମ ଜିଲା ପୋଲସରା ଥାନା ଚଢିଆପଦା ଗ୍ରାମର ସନ୍ୟାସୀ ସାହୁ । ପାଟପୁର ଗ୍ରାମରେ ମାଁ ଠାକୁରାଣୀଙ୍କ ଯାତ୍ରା ସକାଶେ ମୀନା ବଜାର ଖୋଲା ଯାଇଥିଲା । ରବିବାର ଯାତ୍ରା ସରିବା ପରେ ଦୁଇ ଶ୍ରମିକ କାମ ସାରି ଖରାରୁ ଟିକେ ବିଶ୍ରାମ ନେବା ପାଇଁ ଆମ୍ବଗଛ ତଳେ ଆଶ୍ରୟ ନେବା ସହ ମୋବାଇଲ୍ ବ୍ଯବହାର କରୁଥିଲେ ।
ଏହି ସମୟରେ ଆକାଶରେ କଳାମେଘ ସହ ପ୍ରବଳ ବର୍ଷା ଓ ବଜ୍ରପାତ ହୋଇଥିଲା। ଆକସ୍ମିକ ବଜ୍ରପାତରେ ଉଭୟେ ଚେତାଶୁନ୍ୟ ହୋଇ ପଡ଼ିଥିଲେ । ଖବରପାଇ ଘଟଣାସ୍ଥଳରେ ପାଟପୁର ଥାନା ପୋଲିସ ପହଞ୍ଚି ଅଚେତ ଅବସ୍ଥାରେ ଦୁହିଁଙ୍କୁ ଆମ୍ବୁଲାନ୍ସ ଯୋଗେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ ମଧ୍ୟ ଉପସ୍ଥିତ ଡାକ୍ତର ଉଭୟ ଙ୍କୁ ମୃତ ଘୋଷଣା କରିଥିଲେ । ମୃତଦେହ ଦୁଇଟି କୁ ଜବତ କରି ଅପମୃତ୍ୟୁ ମାମଲା ରୁଜୁ କରାଯିବା ସହ ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ଡାକ୍ତରଖାନା କୁ ପଠାଯାଇଥିବା ପାଟପୁର ଥାନା ଆଇ ଆଇ ସି ଅଜୟ କୁମାର ସ୍ବାଇଁ ସୂଚନା ଦେଇଛନ୍ତି ।