ବିପ୍ଲବୀ ପରିକ୍ରମା ବ୍ୟୁରୋ :- ବିଶ୍ବକପ ବେଳେ ଆହତ ହେବା ପରେ ଟିମକୁ ଫେରି ପାରିନାହାନ୍ତି ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା । ଏବେ ସେ ଦଳକୁ ଫେରିବା ନଫେରିବା ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି । ବର୍ତ୍ତମାନ ସେ ଫିଟନେସ ଫେରି ପାଇବାକୁ ପରିଶ୍ରମ ଜାରି ରଖିଛନ୍ତି । ସେ ଦଳକୁ କେବେ ଫେରିବେ ତାହାକୁ ନେଇ କିଛି ସ୍ପଷ୍ଟ ହୋଇ ପାରିନାହିଁ । ତେବେ ହାର୍ଦ୍ଦିକଙ୍କ ଅନୁପସ୍ଥିତିରେ ତାଙ୍କ ବିକଳ୍ପ ପ୍ରସ୍ତୁତ କରି ସାରିଛି ବିସିସିଆଇ ବା ଟିମ ମ୍ୟାନେଜମେଣ୍ଟ । ଯାହା ଫଳରେ ଦଳରେ ତାଙ୍କ ସ୍ଥାନ ସଙ୍କଟରେ ପଡ଼ିଥିବା ଚର୍ଚ୍ଚା ହେଉଛି । କାରଣ ବିସିସିଆଇ ଯାହାଙ୍କୁ ତାଙ୍କ ବିକଳ୍ପ ଭାବରେ ଦେଖୁଛି, ସେ ଏବେ ଦମଦାର ଫର୍ମରେ ରହି ଚମତ୍କାର ପ୍ରଦର୍ଶନ ଜାରି ରଖିଛନ୍ତି । ଆମେ କହୁଛୁ ଅଲରାଉଣ୍ଡର ଶିବମ ଦୁବେଙ୍କ କଥା, ବର୍ତ୍ତମାନ ଆଫଗାନିସ୍ତାନ ବିପକ୍ଷରେ ଜାରି ରହିଥିବା ଟି-୨୦ ସିରିଜରେ ଦମଦାର ପ୍ରଦର୍ଶନ ଜାରି ରଖିଛନ୍ତି । ଦ୍ବିତୀୟ ମ୍ୟାଚରେ ସେ ଅର୍ଦ୍ଧ ଶତକ ହାସଲ କରିବା ସହ ୱିକେଟ ମଧ୍ୟ ଦଖଲ କରିଥିଲେ । ବର୍ତ୍ତମାନ ହାର୍ଦ୍ଦିକଙ୍କ ବଦଳରେ ଶିବମ ଦୁବେଙ୍କ ସହ ସେଣ୍ଟ୍ରାଲ କଣ୍ଟ୍ରାକ୍ଟ ଉପରେ ବିଚାର କରୁଛି ବିସିସିଆଇ । ତେବେ ଏହାକୁ ନେଇ ଆନୁଷ୍ଠାନିକ ଭାବରେ କୌଣସି ପ୍ରତିକ୍ରିୟା ମିଳିନାହିଁ ।