ଗଜପତି ( ବିପ୍ଲବୀ ପରିକ୍ରମା ):- ଗଜପତି ଜିଲ୍ଲା କାଶୀନଗର ଏନଏସି ୧୨ନମ୍ବର ୱାର୍ଡରେ ବସବାସ କରୁଥିବା ବ୍ୟବସାୟୀ ନିରଞ୍ଜନ ବେହେରାଙ୍କ ରବିବାର ବିଳମ୍ବିତ ରାତ୍ରରେ ମୃତ୍ୟୁ ଘଟିଥିଲା। ତାଙ୍କର ମୃତ୍ୟୁ ବେଳେ ତାଙ୍କ ପତ୍ନୀ, ବୋହୂ ଓ ନାତି ରହିଥିଲେ। ତାଙ୍କ ଏକ ମାତ୍ର ପୁଅ ଓ ଦୁଇଟି ଝିଅ ରହିଥିବା ବେଳେ ସମସ୍ତେ ବିବାହିତ ଥିବା ଜଣାପଡିଛି। କିନ୍ତୁ ବାପାଙ୍କ ବିୟୋଗରେ ପୁଅ ସାନ୍ତୁନ ଅନୁପସ୍ଥିତ ରହିବାରୁ ତାଙ୍କ ବୋହୁ ଜୟନ୍ତୀ ନାୟକ ଓ ନାତି ମୁଖାଗ୍ନୀ ଦେଇଥିବା ଏବେ କାଶୀନଗର ସହରରେ ଚର୍ଚ୍ଚାର ବିଷୟ ପାଲଟିଛି। ଜୟନ୍ତୀ ନେଇଥିବା ନିଷ୍ପତିକୁ କାଶୀନଗର ଜନସାଧାରଣ ପ୍ରଶଂସା କରିଛନ୍ତି।
ସୂଚନା ମୁତାବକ ନିରଞ୍ଜନଙ୍କ ଏକ ମାତ୍ର ପୁତ୍ର ସାନ୍ତୁନୁ ବେହେରାଙ୍କୁ କାଶୀନଗର ବାସିନ୍ଦା ରୁକୋମଣ ନାୟକଙ୍କ ଏକ ମାତ୍ର କନ୍ୟା ଜୟନ୍ତୀକୁ ବିବାହ କରିଥିଲେ। ହେଲେ ତାଙ୍କର ଗୋଟିଏ ପୁଅ ଥିବା ବେଳେ ସାନ୍ତୁନୁ ଅନ୍ୟ ଏକ ଝିଅକୁ ପ୍ରେମ ବିବାହ କରି ଘରରୁ ବାହାରକୁ ଚାଲିଯାଇଥିଲେ। ନିରଂଜନଙ୍କ ଦୁଇଟି ଝିଅ ବିବାହ କରି ବାହାରେ ରହୁଥିବା ବେଳେ ତାଙ୍କ ପାଖରେ ପତ୍ନୀ, ବୋହୂ ଓ ନାତି ରହୁଥିଲେ। ହଠାତ୍ ତାଙ୍କର ମୃତ୍ୟୁ ହୋଇଥିବା ବେଳେ ବୋହୂ ନିଷ୍ପତି ନେଇ ମୁଖାଗ୍ନୀ ଦେଇଥିଲେ। ବର୍ତ୍ତମାନ ଜୟନ୍ତୀଙ୍କୁ ବିଭିନ୍ନ ମହଲରେ ପ୍ରଶଂସା କରୁଥିବା ବେଳେ ସ୍ଥାନୀୟ ଲୋକେ ତାଙ୍କ ଶ୍ଵଶୁରଙ୍କ ବିୟୋଗରେ ସାନ୍ତୁନା ଦେଇଛନ୍ତି। ନିରଞ୍ଜନ ସ୍ଥାନୀୟ ଅଞ୍ଚଳରେ ଜଣାଶୁଣା ବ୍ୟବସାୟୀ ଭାବେ ପରିଚିତ ଥିବା ବେଳେ ତାଙ୍କ ବିୟୋଗ ଯୋଗୁ ଅଞ୍ଚଳରେ ଶୋକର ଛାୟା ଖେଳିଯାଇଛି।