ଗଜପତି ( ବିପ୍ଲବୀ ପରିକ୍ରମା ):- ଗଜପତି ଜିଲ୍ଲା ଗୋଷାଣି ବ୍ଲକ ଗୁରାଣ୍ଡି ଥାନା ଅନ୍ତର୍ଗତ ଶରଧାପୁର ସ୍ବଶାନଘାଟ ନିକଟରେ ଗତ କାଲି ବିଳମ୍ବିତ ସନ୍ଧ୍ୟାରେ ହୋଇଥିଲା ସଂଘବଦ୍ଧ ଆକ୍ରମଣ । ଏହି ଆକ୍ରମଣରେ ଜଣେ ଯୁବକଙ୍କ ପ୍ରାଣ ଯାଇଛି । ଘଟଣାରୁ ପ୍ରକାଶ ଯେ, ପୂର୍ବ ଗତକାଲି ବିଳମ୍ବିତ ସନ୍ଧ୍ୟାରେ ପୂର୍ବ ଶତ୍ରୁତାକୁ ନେଇ ଭିନ୍ନଳା ଗ୍ରାମର କିଛି ଯୁବକ ମୃତ ପ୍ରଶାନ୍ତ ଜେନା(24)ଙ୍କୁ କାଠଫାଳିଆ, ଲୁହାଛଡ ଏବଂ କାତିରେ ଆକ୍ରମଣ କରିଥିଲେ । ଏହି ଖବର ଭିନ୍ନଳା ଗ୍ରାମରେ ପହଞ୍ଚିବା ପରେ ମୃତକଙ୍କ ପରିବାର ଏବଂ ଗ୍ରାମବାସୀ ପହଞ୍ଚି ଗୁରାଣ୍ଡି ପୋଲିସକୁ ଖବର ଦେବା ସହ ଗୁରୁତର ପ୍ରଶାନ୍ତଙ୍କୁ ତୁରନ୍ତ ପାରଳାଖେମୁଣ୍ଡି ସ୍ଥିତ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ ।
ହେଲେ ଅବସ୍ଥା ସଙ୍କଟାପନ୍ନ ଥିବାରୁ ଉଚ୍ଚ ଚିକିତ୍ସା ନିମନ୍ତେ ବିଶାଖାପାଟଣା ସ୍ଥାନାନ୍ତର କରାଯାଉଥିବା ସମୟରେ ବାଟରେ ପ୍ରଶାନ୍ତଙ୍କର ମୃତ୍ୟୁ ଘଟିଥିଲା । ମୃତ ଯୁବକ ପ୍ରଶାନ୍ତ ଜେନାଙ୍କ ପରିବାର ଲୋକଙ୍କ ଅଭିଯୋଗ କ୍ରମେ ଗୁରାଣ୍ଡି ପୋଲିସ ଥାନା ଅଧିକାରୀ ରବୀନ୍ଦ୍ର ପାତ୍ର ସଦଳେବଳେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଏହା ସହ ଘଟଣା ସ୍ଥଳକୁ ସାଇଣ୍ଟିଫିକ୍ ଟିମ୍ ସହ ପାରଳାଖେମୁଣ୍ଡି ଏସଡିପିଓ ମାଧବା ନନ୍ଦ ନାୟକ ପ୍ରମୁଖ ପହଞ୍ଚି ତଦନ୍ତ ଏବଂ ଯାଞ୍ଚ କରୁଥିବାର ମଧ୍ୟ ଜଣାପଡିଛି । ଅନ୍ୟପକ୍ଷରେ ହତ୍ୟାକାଣ୍ଡର କାରଣ ପୂର୍ବ ଶତ୍ରୁତା ବୋଲି କୁହାଯାଉଥିବା ବେଳେ ମୁଖ୍ୟକରି ପ୍ରେମବ୍ୟାପାରକୁ ନେଇ ସଂଘବଦ୍ଧ ଭାବେ ଆକ୍ରମଣ ଏବଂ ହତ୍ୟା କରାଯାଇଥିବାର ଗ୍ରାମବାସୀଙ୍କ ମଧ୍ୟରେ ଆଲୋଚନା ହେଉଛି ।