ବିପ୍ଲବୀ ପରିକ୍ରମା ଡିଜିଟାଲ :- ରାଜ୍ୟରେ ଅମଳ ସମୟରେ ଅଦିନିଆ ବର୍ଷା କ୍ଷୟକ୍ଷତି ଚାଷୀକୂଳକୁ ଅସ୍ତବ୍ୟସ୍ତ କରିଛି । କ୍ଷେତରେ ଅମଳ ଧାନ ପାଣିରେ ଭାସୁଥିବା ବେଳେ ମଣ୍ଡି ଖୋଲିବାରେ ମଧ୍ୟ ବିଳମ୍ବ ହେବାରେ ଲାଗିଛି । ଏହି କାରଣରୁ ଏକାଧିକ ସ୍ଥାନରୁ ଚାଷୀ ଆତ୍ମହତ୍ୟାର ଅଭିଯୋଗ ମଧ୍ୟ ଆସିଲାଣି । ଯାହା ମୋହନ ସରକାର ପାଇଁ ଅଡୁଆ ସ୍ଥିତି ସୃଷ୍ଟି କଲାଣି । ଏପରି ସ୍ଥିତିରେ କ୍ଷତିଗ୍ରସ୍ତ ଚାଷୀଙ୍କୁ ଭେଟିବେ ବିରୋଧୀ ଦଳ ନେତା ନବୀନ ପଟ୍ଟନାୟକ । ନବୀନ ସିଧା କ୍ଷେତକୁ ଯାଇ କ୍ଷତିଗ୍ରସ୍ତ ଚାଷୀଙ୍କୁ ଭେଟିବେ ।ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କ ପ୍ରସ୍ତାବିତ ଜିଲ୍ଲା ଗସ୍ତ କାର୍ଯ୍ୟକ୍ରମ ଡିସେମ୍ବର ୩୦ରୁ ଆରମ୍ଭ ହେବ । ଗୃହଜିଲ୍ଲା ଗଞ୍ଜାମରୁ କାର୍ଯ୍ୟକ୍ରମ ଆରମ୍ଭ କରିବେ ବିଜେଡି ସଭାପତି । ଅଦିନିଆ ବର୍ଷାରେ କ୍ଷତିଗ୍ରସ୍ତ କ୍ଷେତକୁ ପରିଦର୍ଶନରେ ଯିବା ସହ ଚାଷୀଙ୍କୁ ଭେଟିବେ ନବୀନ । ପରବର୍ତ୍ତୀ ସମୟରେ ନବୀନଙ୍କ ଅନ୍ୟାନ୍ୟ ଜିଲ୍ଲା ଗସ୍ତ କାର୍ଯ୍ୟକ୍ରମ ରହିଛି ।ଅଦିନିଆ ବର୍ଷା ଯୋଗୁଁ ରାଜ୍ୟରେ ବ୍ୟାପକ ମାତ୍ରାରେ ଚାଷ ଜମି କ୍ଷତିଗ୍ରସ୍ତ ହୋଇଛି । ଫସଲହାନୀ ଯୋଗୁଁ ରାଜ୍ୟରେ ଚାଷୀ ମୃତ୍ୟୁ ଅଭିଯୋଗ ଆସିଛି । କେନ୍ଦ୍ରାପଡା, ଗଞ୍ଜାମ ଓ ଯାଜପୁର ଜିଲ୍ଲାରେ ଗତ ୪ ଦିନରେ ୫ ଜଣ ଚାଷୀଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି । ଚାଷୀ ମୃତ୍ୟୁ ଘଟଣାକୁ ଗୁରୁତର ସହ ନେଇ ଆଗକୁ ବଢ଼ୁଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ସ୍ଥଗିତ ଥିବା ନବୀନଙ୍କ ଜିଲ୍ଲା ଗସ୍ତ ଆସନ୍ତା ୩୧ ତାରିଖରୁ ଆରମ୍ଭ ହେଉଛି ।
ନିର୍ବାଚନ ପରାଜୟ ପରେ ନବୀନଙ୍କର ଏହା ପ୍ରଥମ ଜିଲ୍ଲା ଗସ୍ତ । ଗସ୍ତ କାର୍ଯ୍ୟକ୍ରମ ନବୀନ ନିଜର ଘରୋଇ ଜିଲ୍ଲା ଗଞ୍ଜାମରୁ ଆରମ୍ଭ କରିବେ । ଦିନିକିଆ ଗଞ୍ଜାମ ଗସ୍ତ କାର୍ଯ୍ୟକ୍ରମରେ ନବୀନ ପ୍ରଥମେ କବିସୂର୍ଯ୍ୟନଗର ପରେ ଆସିକା ଓ ହିଞ୍ଜିଳି ଅଞ୍ଚଳ ପରିଦର୍ଶନ କରିବେ । କ୍ଷେତକୁ ଯାଇ କ୍ଷୟକ୍ଷତି ଦେଖିବା ସହ ଚାଷୀଙ୍କୁ ଭେଟି ଆଲୋଚନା କରିବେ ନବୀନ । ସେହିପରି ୩୧ ତାରିଖରେ ନବୀନଙ୍କର କେନ୍ଦ୍ରାପଡା ଜିଲ୍ଲା ଗସ୍ତ କାର୍ଯ୍ୟକ୍ରମ ଥିବା ବିଜେଡି ପକ୍ଷରୁ ସୂଚନା ଦିଆଯାଇଛି । ଆଗାମୀ ଦିନରେ ନବୀନ ଅନ୍ୟାନ୍ୟ ଜିଲ୍ଲା ମଧ୍ୟ ପରିଦର୍ଶନ କରିବେ ।