ପାରଳାଖେମୁଣ୍ଡି ( ବିପ୍ଲବୀ ପରିକ୍ରମା ଡିଜିଟାଲ ):- : ଶ୍ରୀ କୃଷ୍ଣଚନ୍ଦ୍ର ଗଜପତି ସ୍ୱୟଂଶାସିତ ମହାବିଦ୍ୟାଳୟ, ପାରଳାଖେମୁଣ୍ଡି ଗଣିତ ବିଭାଗ ମୁଖ୍ୟ ତଥା ସହକାରୀ ପ୍ରଫେସର ଡକ୍ଟର ଅଶ୍ୱିନୀ କୁମାର ରାଉତ ଓ ବ୍ରହ୍ମପୁର ବିଶ୍ଵବିଦ୍ୟାଳୟ ପରୀକ୍ଷା ନିୟନ୍ତ୍ରକ ଡକ୍ଟର ସତ୍ୟନାରାୟଣ କୁଣ୍ଡଙ୍କ ଦ୍ୱାରା ମିଳିତ ଭାବରେ ଲିଖିତ “ନୁମେରିକାଲ ମେଥଡ଼” ଗଣିତ ପୁସ୍ତକକୁ ମହାବିଦ୍ୟାଳୟର ଅଧ୍ୟକ୍ଷ ଡକ୍ଟର ଜିତେନ୍ଦ୍ରନାଥ ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗ ଦେଇ ଉନ୍ମୋଚନ କରିଥିଲେ | ଏହା ସ୍ନାତକ ଛାତ୍ରଛାତ୍ରୀଙ୍କ ପାଇଁ ବହୁମୁଖୀ ବିଷୟ ଭାବରେ ନିଶ୍ଚିତ ଏକ ଉପାଦେୟ ପୁସ୍ତକ ଭାବରେ ନୂତନ ଶିକ୍ଷାନୀତିର ଲକ୍ଷ୍ୟକୁ ସାଧନ କରିପାରିବ ବୋଲି ଅଧ୍ୟକ୍ଷ ମହୋଦୟ ଆଶାବ୍ୟକ୍ତ କରି ଏହାର ଭୁୟସୀ ପ୍ରଶଂସା କରିବା ସହ ମହାବିଦ୍ୟାଳୟର ଗର୍ବ ଓ ଗୌରବ ବୋଲି କହିଥିଲେ | ଇତିହାସ ବିଭାଗ ମୁଖ୍ୟ ପ୍ରଫେସର ରାଧାକାନ୍ତ ଭୂୟାଁ ମୁଖ୍ୟ ବକ୍ତା ଓ ମହାବିଦ୍ୟାଳୟ ପରୀକ୍ଷା ନିୟନ୍ତ୍ରକ ତଥା ସଂସ୍କୃତ ବିଭାଗ ମୁଖ୍ୟ ଡକ୍ଟର ବିଘ୍ନେଶ୍ୱର ମିଶ୍ର ସମ୍ମାନିତ ଅତିଥି ଭାବରେ ଯୋଗଦେଇ ପୁସ୍ତକର ଲକ୍ଷ୍ୟ ଓ ଦିଗ ଉପରେ ଆଲୋକପାତ କରି ଲେଖକଙ୍କୁ ସାଧୁବାଦ ଜଣାଇଥିଲେ | ଡକ୍ଟର ରାଉତ ତାଙ୍କ ଅଭିଭାଷଣରେ ପୁସ୍ତକଟିର ସ୍ୱତନ୍ତ୍ରତା ଉପରେ ଆଲୋକପାତ କରି କହିଛନ୍ତି ଯେ ପୁସ୍ତକଟି ନୂତନ ଶିକ୍ଷାନୀତି -୨୦୨୦ ଆଧାରିତ ବହୁମୁଖୀ ବିଷୟ ଭାବରେ ବିଜ୍ଞାନ, ବାଣିଜ୍ୟ,କଳା ଓ ବୈଷୟିକ ଶିକ୍ଷା ସ୍ନାତକ ଛାତ୍ରଛାତ୍ରୀଙ୍କ ପାଇଁ ଏକ ଅନନ୍ୟ ପୁସ୍ତକ ଅଟେ |ପୁସ୍ତକଟି “ଛ”ଗୋଟି ଅଧ୍ୟାୟରେ ବିଭକ୍ତ ହୋଇ ନୂତନ ଶିକ୍ଷନୀତି ସିଲାବସ ଆଧାରରେ ପ୍ରସ୍ତୁତ ହୋଇଛି |ପ୍ରତ୍ୟେକ ଅଧ୍ୟାୟରେ ଗୁରୁତ୍ୱପୂର୍ଣ ମନ୍ତବ୍ୟ ସାଙ୍ଗକୁ ଶେଷରେ ସାରାଂଶ ଉଲ୍ଲେଖ ଅଛି | ପ୍ରତ୍ୟେକ ଅଧ୍ୟାୟର ପ୍ରଶ୍ନାବଳୀରେ ସଂକ୍ଷିପ୍ତ ପ୍ରଶ୍ନ ଓ ଦୀର୍ଘ ପ୍ରଶ୍ନ ସହ ଉତ୍ତର ସନ୍ନିବେଶୀତ କରାଯାଇଛି ଯାହା ଛାତ୍ରଛାତ୍ରୀଙ୍କ ପାଇଁ ଅଧିକ ଉପଯୋଗୀ ହୋଇପାରିବ |ବିଷୟ ବସ୍ତୁକୁ ସରଳ ଓ ସହଜ ଭାବରେ କୌଶଭିତ୍ତିକ ବର୍ଣ୍ଣନା କରାଯାଇଛି |ତେଣୁ,ସ୍ନାତକ ସ୍ତରରେ ଯେକୌଣସି ଛାତ୍ରଛାତ୍ରୀ ଏହାକୁ ପଠନ କଲେ ସହଜରେ ବୋଧଗମ୍ୟ ହୋଇପାରିବ ଓ ଶିକ୍ଷକମାନେ ମଧ୍ୟ ପଢ଼ାଇବାରେ କୌଣସି କଷ୍ଟ ସାଧ୍ୟ ହେବ ନାହିଁ ବୋଲି ସେ ଆଶାବ୍ୟକ୍ତ କରିଛନ୍ତି ମହାବିଦ୍ୟାଳୟର ସମସ୍ତ ଅଧ୍ୟାପକ ଓ ଅଧ୍ୟାପିକା, ଗଣିତ ବିଭାଗର ସମସ୍ତ ଛାତ୍ର/ଛାତ୍ରୀ ଉକ୍ତ କାର୍ଯ୍ୟକ୍ରମରେ ଯୋଗଦାନ କରିଥିଲେ | କାର୍ଯ୍ୟକ୍ରମକୁ ଗଣିତ ବିଭାଗ ସହକାରୀ ପ୍ରଫେସର ଡକ୍ଟର ମାନସୀ ସାହୁକାର ଓ ସହକାରୀ ପ୍ରଫେସର ରାଜେନ୍ଦ୍ର ଗିରି ପରିଚାଳନା କରିଥିଲେ |ପରିଶେଷରେ ବିଭାଗର ସହକାରୀ ପ୍ରଫେସର ଅଜୟ କୁମାର ରଇତ ଧନ୍ୟବାଦ ଅର୍ପଣ କରିଥିଲେ |