ବିପ୍ଲବୀ ପରିକ୍ରମା ବ୍ୟୁରୋ :- ସୁପ୍ରିମ୍କୋର୍ଟ ଆଜି କହିଛନ୍ତି ଯେ, ଏହା ନିର୍ବାଚନ ପାଇଁ ନିୟନ୍ତ୍ରଣ କର୍ତ୍ତୃପକ୍ଷ ନୁହନ୍ତି ଏବଂ ଏହାର ସାମ୍ବିଧାନିକ କର୍ତ୍ତୃପକ୍ଷ ନିର୍ବାଚନ ଆୟୋଗର କାର୍ଯ୍ୟକଳାପକୁ ନିୟନ୍ତ୍ରଣ କରିପାରିବେ ନାହିଁ। ଇଲେକ୍ଟ୍ରୋନିକ୍ ଭୋଟିଂ ମେସିନ୍ (ଇଭିଏମ୍)ରେ ଭିଭିପିଏଟି ସିଷ୍ଟମ୍ ଜରିଆରେ ସୃଷ୍ଟି ହୋଇଥିବା କାଗଜ ସ୍ଲିପ୍ ସହ କ୍ରସ୍ ଭେରିଫିକେସନ୍ ପାଇଁ ହୋଇଥିବା ଆବେଦନର ଶୁଣାଣି ବେଳେ ଏହି ମନ୍ତବ୍ୟ ଦିଆଯାଇଛି। ଅଦାଲତ ବର୍ତ୍ତମାନ ପାଇଁ ରାୟ ସଂରକ୍ଷିତ ରଖିଛନ୍ତି।
ଜଷ୍ଟିସ ସଞ୍ଜୀବ ଖାନ୍ନା ଓ ଜଷ୍ଟିସ ଦୀପଙ୍କର ଦତ୍ତଙ୍କୁ ନେଇ ଗଠିତ ଖଣ୍ଡପୀଠ ପ୍ରଶ୍ନ କରିଛନ୍ତି ଯେ ଏହା କେବଳ ସନ୍ଦେହରେ କାର୍ଯ୍ୟ କରିପାରିବ କି? ଆବେଦନକାରୀ ଆସୋସିଏସନ୍ ଫର୍ ଡେମୋକ୍ରାଟିକ୍ ରିଫର୍ମସ୍ ପକ୍ଷରୁ ଆଇନଜୀବୀ ପ୍ରଶାନ୍ତ ଭୂଷଣଙ୍କ ଉଦ୍ବେଗ ଉପରେ ପ୍ରତିକ୍ରିୟା ରଖି କୋର୍ଟ କହିଛନ୍ତି, ଯଦି ଆପଣ କୌଣସି ଚିନ୍ତାଧାରାରେ ବିବଶ ଅଛନ୍ତି, ତେବେ ଆମେ ଆପଣଙ୍କୁ ସାହାଯ୍ୟ କରିପାରିବୁ ନାହିଁ। ଆମେ ଆପଣଙ୍କ ଚିନ୍ତାଧାରା ପରିବର୍ତ୍ତନ କରିବାକୁ ଏଠାରେ ନାହୁଁ।ଇଭିଏମ୍ ଭୋଟିଂ ବ୍ୟବସ୍ଥାକୁ ନେଇ ବିରୋଧୀଙ୍କ ଆଶଙ୍କା ଭିତରେ ଭିଭିପିଏଟି ବ୍ୟବସ୍ଥାରେ ସୃଷ୍ଟି ହୋଇଥିବା କାଗଜ ସ୍ଲିପ୍ ସହ ଇଭିଏମ୍ରେ ପଡ଼ିଥିବା ପ୍ରତ୍ୟେକ ଭୋଟ୍କୁ କ୍ରସ୍ ଭେରିଫିକେସନ୍ କରିବାକୁ ନିର୍ଦ୍ଦେଶ ଦେବାକୁ ଆବେଦନରେ ଦାବି କରାଯାଇଛି। ବର୍ତମାନ ପ୍ରତି ବିଧାନସଭା ନିର୍ବାଚନ ମଣ୍ଡଳୀରେ ୫ଟି ଇଭିଏମ୍ ପାଇଁ କ୍ରସ୍ ଭେରିଫିକେସନ୍ କରାଯାଉଛି।
ପୂର୍ବ ଶୁଣାଣିରେ ଆବେଦନକାରୀମାନେ ଜନସାଧାରଣଙ୍କ ଆସ୍ଥା ପ୍ରସଙ୍ଗ ଉଠାଇ ବାଲଟ୍ ଭୋଟିଂ ବ୍ୟବସ୍ଥାକୁ ଫେରିଥିବା ୟୁରୋପୀୟ ଦେଶଗୁଡ଼ିକ ସହ ତୁଳନା କରିଥିଲେ। ଅଦାଲତ ଏଭଳି ତୁଳନାକୁ ଖାରଜ କରି କହିଛନ୍ତି ଯେ ଏଠାରେ ଚ୍ୟାଲେଞ୍ଜ ଭିନ୍ନ। ଅନ୍ୟପକ୍ଷରେ ନିର୍ବାଚନ ଆୟୋଗ କହିଛନ୍ତି ଯେ ବର୍ତ୍ତମାନର ବ୍ୟବସ୍ଥା ନିରପେକ୍ଷ। ଇଭିଏମ୍ରେ କଣ୍ଟ୍ରୋଲ ୟୁନିଟ୍ ଓ ବ୍ୟାଲଟିଂ ୟୁନିଟ୍ ରହିଛି। ଏଗୁଡ଼ିକ ଏକ କେବୁଲ୍ ଦ୍ୱାରା ସଂଯୋଜିତ। ଏହା ଏକ ଭିଭିପିଏଟି (ଭୋଟର ଭେରିଫାଏଡ୍ ପେପର ଅଡିଟ୍ ଟ୍ରେଲ୍) ମେସିନ୍ ସହିତ ମଧ୍ୟ ସଂଯୁକ୍ତ। ଏହି ମେସିନ୍ ଦ୍ୱାରା ଜଣେ ଭୋଟର ଠିକ୍ ଭାବରେ ମତଦାନ ହୋଇଛି କି ନାହିଁ ତାହା ଦେଖିପାରିବେ।
ଆଜି ସକାଳୁ ଶୁଣାଣି ଆରମ୍ଭ ହେବା ପରେ ଅଦାଲତ ନିର୍ବାଚନ କମିସନଙ୍କୁ ସିଷ୍ଟମରେ ପୁନଃପ୍ରୋଗ୍ରାମିଂ କରାଯାଇପାରିବ କି ନାହିଁ ସେ ସମ୍ପର୍କରେ କିଛି ସ୍ପଷ୍ଟୀକରଣ ମାଗିଛନ୍ତି। ନିର୍ବାଚନ ଆୟୋଗ ଏହାର ଜବାବରେ କହିଛନ୍ତି ଯେ ଏହି ତିନୋଟି ୟୁନିଟ୍ର ନିଜସ୍ୱ ମାଇକ୍ରୋକଣ୍ଟ୍ରୋଲର ଅଛି ଏବଂ ଏଗୁଡ଼ିକ କେବଳ ଥରେ ପ୍ରୋଗ୍ରାମ କରାଯାଇପାରିବ। ଭୂଷଣ ଯୁକ୍ତି କରିଥିଲେ ଯେ ଏହି ମାଇକ୍ରୋକଣ୍ଟ୍ରୋଲରଗୁଡିକର ଏକ ଫ୍ଲାସ୍ ମେମୋରି ଅଛି ଯାହା ପୁନଃ ପ୍ରୋଗ୍ରାମେବଲ୍ ଅଟେ।
ତେବେ ନିର୍ବାଚନ କମିସନଙ୍କ ବୈଷୟିକ ରିପୋର୍ଟ ଉପରେ ବିଶ୍ୱାସ କରିବାକୁ ପଡ଼ିବ ବୋଲି କୋର୍ଟ କହିଛନ୍ତି। ଆମେ ଅନ୍ୟ ସାମ୍ବିଧାନିକ କର୍ତ୍ତୃପକ୍ଷଙ୍କ ନିୟନ୍ତ୍ରଣ କର୍ତ୍ତୃପକ୍ଷ ନୁହଁ, ଆମେ ନିର୍ବାଚନକୁ ନିୟନ୍ତ୍ରଣ କରିପାରିବୁ ନାହିଁ ବୋଲି କୋର୍ଟ କହିଥିଲେ।