ବିପ୍ଲବୀ ପରିକ୍ରମା ଡିଜିଟାଲ :- ଆଜି ପବିତ୍ର ଅଶୋକାଷ୍ଟମୀ l ହିନ୍ଦୁ ଧର୍ମରେ ୧୨ମାସରେ ୧୩ ପର୍ବ ପାଳନ କରାଯାଏ। ଏଥିମଧ୍ୟରୁ ଚଇତ୍ର ମାସ ଶୁକ୍ଳପକ୍ଷ ଅଷ୍ଟମୀ ତିଥିରେ ଅଶୋକାଷ୍ଟମୀ ପର୍ବ ପାଳିତ ହୁଏ ।ଏହିଦିନ ଅଶୋକ ବୃକ୍ଷ ଏବଂ ଭଗବାନ ଶଙ୍କରଙ୍କର ପୂଜା କରାଯାଇଥାଏ। ଏଥିସହ ଅଶୋକ ଗଛ ଚାରିପଟେ ୧୦୮ ଥର ପରିକ୍ରମା କରିବା ଦ୍ୱାରା ପୂଣ୍ୟ ଫଳ ପ୍ରାପ୍ତି ହୋଇଥାଏ ବୋଲି ବିଶ୍ୱାସ ରହିଛି । ଆଜି ଅନୁଷ୍ଠିତ ହେବ ପ୍ରଭୁ ଲିଙ୍ଗରାଜଙ୍କ ପ୍ରସିଦ୍ଧ ରୁକୁଣା ରଥଯାତ୍ରା। ଏନେଇ ଚଳଚଞ୍ଚଳ ହୋଇଛି ଏକାମ୍ର କ୍ଷେତ୍ର। ଏଥିଲାଗି ସମସ୍ତ ପ୍ରକାର ପ୍ରସ୍ତୁତି ଶେଷ ହୋଇଛି। ପ୍ରାତଃ ୫ଟାରୁ ଆରମ୍ଭ ହୋଇଛି ନୀତିକାନ୍ତି । ସକାଳ ୫ଟାରୁ ୫ଟା୩୦ ମଧ୍ୟରେ ଅନୁଷ୍ଠିତ ହୋଇଛି ମଙ୍ଗଳ ଆରତି। ଏହାପରେ ଅନୁଷ୍ଠିତ ହୋଇଛି ସାହାଣ ମେଲା ଦର୍ଶନ। ପରେ ସରିଛି ରୋଷ ବା ପାକ୍ ପୂଜା ଏବଂ ଛାମୁ ପରିଷ୍କାର ନୀତି ସାରି ୭ରୁ ୮ଟା ମଧ୍ୟରେ ସରିଛି ମହାସ୍ନାନ ନୀତି l ଏହାପରେ ବଲ୍ଲଭ ନୀତି ସାରି ପ୍ରାୟ ୮ଟି ନୀତି ପରେ ଦିନ ୧୧ଟା ସମୟରେ ପ୍ରଭୁଙ୍କର ବେଶ କରାଯାଇ ମଧ୍ୟାହ୍ନ ୧୨ଟାରେ ହେବ ଯାତ୍ରା ପୂଜା ଏବଂ ୧୨ଟା ୩୦ ସମୟରେ ହେବ ପହଣ୍ଡି। ଏସମସ୍ତ ନୀତି ପରେ ରଥରେ ପୂଜାର୍ଚ୍ଚନା କରାଯାଇ ପ୍ରାୟ ୩ଟା୩୦ରେ ରଥଟଣା ହେବ। ଏଥିପାଇଁ ସମୟ ନିର୍ଦ୍ଧାରଣ କରାଯାଇଛି।