ବିପ୍ଲବୀ ପରିକ୍ରମା ଡିଜିଟାଲ :- ସରକାର ବଦଳିଲା ନିୟମ ବି ବଦଳିଗଲା । ଏଣିକି ରାସନ କାର୍ଡ ପାଇବାରୁ ବଞ୍ଚିତ ହେବେ ଗ୍ରାମରକ୍ଷୀ । ମାସକୁ ୧୮ ଶହ ଟଙ୍କା ଭତ୍ତା ପାଉଥିବା ଗ୍ରାମରକ୍ଷୀଙ୍କୁ ସରକାରୀ ଚାକିରି କହି ରାସନ କାର୍ଡ ରଦ୍ଦ କରିବାକୁ ଯୋଜନା କରିଛନ୍ତି ରାଜ୍ୟ ସରକାର । ନୂଆ ନିୟମ ଲାଗୁ ହେଲେ ରାସନ କାର୍ଡ ପାଇବାରୁ ବଞ୍ଚିତ ହୋଇପାରନ୍ତି ୧୮ ହଜାର ଗ୍ରାମରକ୍ଷୀଙ୍କ ପରିବାର ।
ମାସକୁ ମିଳୁଛି ୧୮ଶହ ଟଙ୍କା, ତାହା ପୁଣି ଦରମା ନୁହଁ ଭତ୍ତା, ଭତ୍ତା ସିନା ମିଳୁଛି କିନ୍ତୁ ସରକାର କହୁଛନ୍ତି ଏମାନେ ସରକାରୀ କର୍ମଚାରୀ । ନିୟମ ଅନୁଯାୟୀ ସରକାରୀ କର୍ମଚାରୀଙ୍କ ପରିବାରଲୋକ ପାଇପାରିବେ ନାହିଁ ରାସନ କାର୍ଡ । ସେଥିପାଇଁ ଗ୍ରାମରକ୍ଷୀଙ୍କ ରାସନ କାର୍ଡ ରଦ୍ଦ କରିବା ପାଇଁ ରାଜ୍ୟ ସରକାର ଆରମ୍ଭ କରିଛନ୍ତି ପ୍ରକ୍ରିୟା । ଆଉ ଏହା ବିରୋଧରେ ଆନ୍ଦୋଳନ ପାଇଁ ଅଣ୍ଟା ଭିଡିଲାଣି ରାଜ୍ୟ ଗ୍ରାମରକ୍ଷୀ ସଂଘ । ସୂଚନା ପ୍ରକାରେ ରାଜ୍ୟର ୧୮ ହଜାର ୪୧୪ ଜଣ ଗ୍ରାମରକ୍ଷୀ ବିଭିନ୍ନ ଗାଁରେ ନିୟୋଜିତ ଅଛନ୍ତି । ଏହି ପରିବାର ପୂର୍ବ ସରକାର ସମୟରେ ରାସନ ପାଉଥିଲେ କିନ୍ତୁ ସରକାର ବଦଳିବା ପରେ ବଦଳିବାକୁ ବସିଛି ନିଷ୍ପତ୍ତି ।