ନୂଆଦିଲ୍ଲୀ ( ବିପ୍ଲବୀ ପରିକ୍ରମା ଡିଜିଟାଲ ):- ୨୭ବର୍ଷର ବନବାସ ସାରି କ୍ଷମତାକୁ ଫେରିଛି ବିଜେପି । ଜାତୀୟ ରାଜଧାନୀରେ କମାଲ୍ କରିଛି ମୋଦିଙ୍କ ମ୍ୟାଜିକ୍ । ୧୯୯୮ ପରେ ଦିଲ୍ଲୀରେ ସରକାର ଗଠନ କରିବାକୁ ଯାଉଛି ବିଜେପି । ତେବେ ବର୍ତ୍ତମାନ ସମୟର ସବୁଠୁ ବଡ଼ ପ୍ରଶ୍ନ, କିଏ ହେବେ ଦିଲ୍ଲୀ ମୁଖ୍ୟମନ୍ତ୍ରୀ? ଏଥର ଦିଲ୍ଲୀରେ କୌଣସି ମୁଖ୍ୟମନ୍ତ୍ରୀ ଚେହେରା ଘୋଷଣା କରିନଥିଲା ବିଜେପି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଚେହେରାରେ ନିର୍ବାଚନ ଜିତି ବଡ ବିଜୟ ହାସଲ କରିଛି ଦଳ । ତେବେ ଦଳର ବିଜୟ ସହ ମୁଖ୍ୟମନ୍ତ୍ରୀ ପଦକୁ ନେଇ ଆରମ୍ଭ ହୋଇଛି କଳ୍ପନାଜଳ୍ପନା । ଦଳର କେନ୍ଦ୍ର ନେତୃତ୍ବ ଏନେଇ ନିଷ୍ପତ୍ତି ନେବେ ବୋଲି କହିଛନ୍ତି ଦିଲ୍ଲୀ ବିଜେପି ସଭାପତି ବୀରେନ୍ଦ୍ର ସଚ୍ଚଦେବା । ସେପଟେ ଅନେକ ନାଁକୁ ନେଇ ହେଲାଣି ଚର୍ଚ୍ଚା ।
କେଜ୍ରିଓ୍ବାଲଙ୍କୁ ହରାଇଲେ, ହେବେ ସିଏମ୍?
ପୂର୍ବତନ ଦିଲ୍ଲୀ ମୁଖ୍ୟମନ୍ତ୍ରୀ ସାହେବ ସିଂ ବର୍ମାଙ୍କ ପୁଅ ପରବେଶ ବର୍ମା ଆପ୍ ମୁଖ୍ୟ ଅରବିନ୍ଦ କେଜ୍ରିଓ୍ବାଲଙ୍କୁ ହରାଇଛନ୍ତି । ପଶ୍ଚିମ ଦିଲ୍ଲୀ ଲୋକସଭା ସିଟରୁ ବିଜେପିରୁ ଦୁଇ ଦୁଇ ଥର ସାଂସଦ ରହିଛନ୍ତି ପରବେଶ ବର୍ମା । ଆପ୍ ମୁଖ୍ୟ ତଥା ପୂର୍ବତନ ମୁଖ୍ୟମନ୍ତ୍ରୀ କେଜ୍ରିଓ୍ବାଲଙ୍କୁ ହରାଇବା ସହ ଦିଲ୍ଲୀ ମୁଖ୍ୟମନ୍ତ୍ରୀ ରେସରେ ଆଗରେ ରହିଛନ୍ତି ପରବେଶ ବର୍ମା । ହାଇପ୍ରୋଫାଇଲ୍ ନୂଆଦିଲ୍ଲୀ ବିଧାନସଭା ସିଟରେ ପୂର୍ବତନ ମୁଖ୍ୟମନ୍ତ୍ରୀ ଶିଲା ଦୀକ୍ଷିତଙ୍କ ପୁଅ ସନ୍ଦୀପ ଦୀକ୍ଷିତ ବି ହାରିଛନ୍ତି । ତେଣୁ ହେଭିଓ୍ବେଟଙ୍କୁ ହରାଇଥିବାରୁ ପରବେଶ ବର୍ମାଙ୍କୁ ମୁଖ୍ୟମନ୍ତ୍ରୀ ପଦର ପୁରସ୍କାର ଦେଇପାରେ ବିଜେପି ।
ରେସରେ ବୀରେନ୍ଦ୍ର ସଚ୍ଚଦେବା
ଦିଲ୍ଲୀ ବିଜେପି ସଭାପତି ବୀରେନ୍ଦ୍ର ସଚ୍ଚଦେବାଙ୍କୁ ବିଜେପି ବିଜୟର ଶ୍ରେୟ ଦିଆଯାଉଛି । ୨୦୨୨ରୁ ସେ ଦିଲ୍ଲୀ ବିଜେପିର କାର୍ଯ୍ୟକାରୀ ସଭାପତି ରହିଥିବା ବେଳେ ୨୦୨୩ରୁ ପୂର୍ଣ୍ଣକାଳୀନ ସଭାପତି ରହିଥିଲେ । ଦଳ ଭିତରର କନ୍ଦଳକୁ ଚେକ୍ ଦେବା ସହ ୧୯୯୮ପରେ ବିଜେପିକୁ ପୁଣି କ୍ଷମତାକୁ ଆଣିବା ପଛରେ ତାଙ୍କର ଗୁରୁତ୍ବପୂର୍ଣ୍ଣ ଭୂମିକା ରହିଛି । ବିଜେପି ଦିଲ୍ଲୀ ଦଖଲ କରିବା ନେଇ ସବୁବେଳେ ଦମ୍ଭ ଦେଖାଇଥିବା ବୀରେନ୍ଦ୍ର ସଚ୍ଚଦେବାଙ୍କ ନାଁ ମଧ୍ୟ ମୁଖ୍ୟମନ୍ତ୍ରୀ ରେସରେ ରହିଛି ।
ବାଂସୁରୀ ସ୍ବରାଜ ହେବେ କି ସିଏମ୍?
ଦିଲ୍ଲୀ ବିଜେପିର ପ୍ରମୁଖ ଚେହେରା ବାଂସୁରୀ ସ୍ବରାଜଙ୍କ ନାଁ ମଧ୍ୟ ମୁଖ୍ୟମନ୍ତ୍ରୀ ପଦ ପାଇଁ ଚର୍ଚ୍ଚାରେ ରହିଛି । ଦିବଂଗତ ସୁଷମା ସ୍ବରାଜଙ୍କ ଝିଅ ବାଂସୁରୀ ଗତ ବର୍ଷ ଦିଲ୍ଲୀରୁ ସାଂସଦ ହୋଇଛନ୍ତି । ପେଶାରେ ଆଇନଜୀବୀ ବାଂସୁରୀଙ୍କୁ ୨୦୨୩ରେ ଦିଲ୍ଲୀ ବିଜେପି ଲିଗାଲ୍ ସେଲ୍ ମୁଖ୍ୟ ଭାବେ ନିଯୁକ୍ତି କରାଯାଇଥିଲା । ପରେ ତାଙ୍କୁ ମୀନାକ୍ଷି ଲେଖିଙ୍କ ଜାଗାରେ ନୂଆଦିଲ୍ଲୀ ଲୋକସଭା ସିଟରୁ ପ୍ରାର୍ଥୀ କରିଥିଲା ବିଜେପି । ସାଂସଦ ନିର୍ବାଚିତ ହେବା ସହ ଦିଲ୍ଲୀ ରାଜନୀତିର ପ୍ରମୁଖ ଚେହେରା ରହିଛନ୍ତି ବାଂସୁରୀ ।
ଚର୍ଚ୍ଚାରେ ମନୋଜ ତିଓ୍ବାରୀ
୨୦୨୪ ଲୋକସଭା ନିର୍ବାଚନରେ ମନୋଜ ତିଓ୍ବାରୀଙ୍କୁ ଏକମାତ୍ର ପ୍ରାର୍ଥୀ ଭାବେ ରିପିଟ୍ କରିଥିଲା ବିଜେପି । ଦିଲ୍ଲୀରେ ବିଜେପିର ଅନ୍ୟତମ ବଡ଼ ଚେହେରା ହେଉଛନ୍ତି ଭୋଜପୁରୀ ଷ୍ଟାର ମନୋଜ ତିଓ୍ବାରୀ । ପୂର୍ବାଞ୍ଚଳୀଙ୍କ ମଧ୍ୟରେ ଲୋକପ୍ରିୟ ରହିଥିବା ମନୋଜ ତିଓ୍ବାରୀ ବିଜେପି ପାଇଁ ପ୍ରଚାର କରିଥିଲେ । ଏହାସହ ଆପ୍ ସରକାର ବିରୋଧରେ ବିଭିନ୍ନ ପ୍ରସଙ୍ଗ ଉଠାଇବା ହେଉ କିମ୍ବା କେଜ୍ରିଓ୍ବାଲଙ୍କୁ ଟାର୍ଗେଟ୍ କରିବା, ବିଜେପି ପକ୍ଷରୁ ଧୁଆଁଧାର ବ୍ୟାଟିଂ କରିଥିଲେ ମନୋଜ ତିଓ୍ବାରୀ । ତେଣୁ ତାଙ୍କୁ ମୁଖ୍ୟମନ୍ତ୍ରୀ ପଦରେ ବସାଇପାରେ ବିଜେପି ।
ଦିଲ୍ଲୀ ମୁଖ୍ୟମନ୍ତ୍ରୀ ପଦ ପାଇଁ ଏସବୁ ନାଁ ଚର୍ଚ୍ଚାରେ ରହିଥିଲେ ମଧ୍ୟ ନୂଆ ନାଁ ଘୋଷଣା କରି ଚମକାଇପାରେ ବିଜେପି । କାରଣ ଦିଲ୍ଲୀ ପରେ ଆପ ହାତରୁ ପଞ୍ଜାବ ଛଡାଇ ଆଣିବାକୁ ରଣନୀତି କରିପାରେ ଦଳ । ଏଭଳି ହେଲେ ରଜୌରୀ ଗାର୍ଡେନ୍ ସିଟରୁ ଜିତିଥିବା ବିଜେପି ପ୍ରାର୍ଥୀ ମଜିନ୍ଦର ସିଂ ସିରସାଙ୍କୁ ମୁଖ୍ୟମନ୍ତ୍ରୀ କରିପାରେ ବିଜେପି । ସେହିପରି ବରିଷ୍ଠ ନେତା ମଦନ ଲାଲ ଖୁରାନାଙ୍କ ପୁଅ ହରିଷ ଖୁରାନାଙ୍କ ନାଁ ମଧ୍ୟ ଟପ୍ ପୋଷ୍ଟ ପାଇଁ ଚର୍ଚ୍ଚା ହେଉଛି ।